सती प्रथा पछि, दाइजो प्रथामाथि फिल्म बन्दै
फिल्मी फण्डा । व्यापारिक तथा समिक्षात्मक रुपमा सफल फिल्म ’झोला’ निर्माण टिम यतिबेला बिना कुनै प्रचारप्रसार नै नयाँ फिल्म ’भोर’ (फर्स्ट लाईट)को छायांकन सकाइसकेका छन् । यादवकुमार भट्टराईको निर्देशनमा तयार गरिएको यस फिल्मको सम्पूर्ण छायांकन जनकपूरमा नै गरिएको हो ।
राज तिमल्सिना र रामगोपाल थापा निर्माता रहेको यस फिल्मलाई दिपक बज्राचार्यले खिचेका हुन् । कृष्ण धारावासीको कथामा निर्मित उक्त फिल्म मैथिली भाषीहरुको वाहुल्यता भएको ठाउँमा उनिहरुकै समाजको समस्यालाई चित्रिण गर्दै निर्माण गरेको निर्देशक यादवकुमार भट्टराईले बताए ।
फिल्म ’झोला’को सफलतापछि आफूमाथि एउटा सफल फिल्म बनाउनु पर्ने दबाब परेको बताउँदै निर्देशक भट्टराईले मधेशको सबभन्दा ठूलो समस्या दाइजोको विकृत रुपलाई फिल्मको माध्यमले सम्पूर्ण नेपालीलाई देखाउन अघि सरेको बताए । ’फिल्मको छायांकन सुरु गरेको समयमा ’झोला’ सफलताको ह्यांङ्गओभरले आफू माथि दबाब बढेको भएपनि ’भोर’मा डुब्दै जाँदा यहाँ जोडिएका कलाकारहरुको उर्जा र समाईएको विषयवस्तुले सबै भुलाएको भन्दै मनोरञ्जनसँगै सामाजिक उत्तरदायित्व फिल्मले बोक्ने भट्टराईले बताए । मैथिली भाषी समुदायमा खिचिएको भए पनि फिल्मलाई नेपाली भन्दै भाषागत तथआ क्षेत्रिय फिल्मको भ्रममा नपर्न उनले सबैमा आग्रह समेत गरे ।
फिल्ममा मधेशमा जरो गाडेर बसेको दाईजो प्रथाको विषयलाई समेटिएको छ । फिल्ममा मिथिलाञ्चलका प्रसिद्ध कलाकार राम नारायण ठाकुरको अलावा मदन ठाकुर, परमेश झा, बिएन पटेल, राजेश सक्सेना, डली सरकार, अनितारानी मण्डल, संगिता देव, सारथी लामा, रितेश पाटली, सुरेन्द्र राय, धीरज ठाकुर लगायतका कलाकारहरुको अभिनय रहेको छ ।
यसमा तपाइँको प्रतिक्रिया दिनुहोस