फ्राईडे रिलिज : पर्दामा दुई फिल्म, सामाजिक कथामा लालपुर्जा र पिँजडा

फिल्मी फण्डा । आज शुक्रवारबाट देशव्यापी रुपमा दुई फिल्म एकसाथ रिलिज हुदैछ । निखील उप्रेतीको भरपुर एक्शन रहेको फिल्म पिँजडा ब्याक अगेन र विपिन कार्की तथा सौगात मल्लको रोमान्टिक ड्रामा रहेको फिल्म लालपुर्जा एकसाथ रिलिज भएको हो । दुबै फिल्म सामाजिक कथामा प्रस्तुत भएका छन् । लालपुर्जालाई मल्टिप्लेक्स टार्गेट भनिएको छ भने पिँजडा ब्याक अगेनलाई सिंगल थिएटर लक्षित भनिएको छ ।

स्वर्गिय निर्देशक शिव रेग्मी प्रति समर्पित गरिएको फिल्म पिँजडा ब्याक अगेन स्वर्गिय श्रीकृष्ण श्रेष्ठ अभिनित फिल्म आफन्तबाट प्रभावित भएर बनाईएको हो । फिल्ममा केही नयाँपन थपिएको छ भने निखीलको एक्शनलाई राम्रै स्थान दिईएको छ । फिल्मको बुधवार राजधानीमा प्रिमियर सम्पन्न भएको थियो । प्रिमियर पछि फिल्मलाई राम्रो प्रतिक्रिया मिलेको छ । द्धन्द्ध निर्देशक हिमाल केसीको डेव्यु निर्देशन रहेको फिल्ममा निखिल र सारा श्रीपाईली सहित पुकार भट्टराई, ज्याक श्रेष्ठ, बाल कलाकार कुशाग्र भट्टराई लगायतको अभिनय छ ।

श्रीराम बराल निर्मित ‘पिंजडा ब्याक अगेन’ मा रमेश सुवेदी र बाबुराज सह निर्माताको रुपमा रहेका छन् । यस्तै फिल्ममा बसन्त शर्मा र सुशान्त श्रेष्ठ कार्यकारी निर्माता तथा रोहित पुरी, गोविन्द गौरा र चन्द्र बहादुर खत्री निर्माताको रुपमा छन् । मौनता श्रेष्ठको कथा, सौरभ लामाको छायाँकन र निर्देशक केसीको द्धन्द्ध निर्देशन रहेको फिल्ममा अर्जुन पोखरेल, राजनराज सिवाकोटीको संगीत रहेको छ ।

यस्तै नेगेटिभ बुद्धको ब्यानरमा निर्माण गरिएको फिल्म लालपुर्जाको पनि राजधानीमा विहीवार प्रिमियर सम्पन्न भएको थियो । प्रिमियर पछि लालपुर्जालाई अपेक्षित प्रतिक्रिया मिलेको छैन । फिल्म हेरिसकेपछि फिल्म वारे मिश्रीत प्रतिक्रिया प्रस्तुत भएको छ । मितेरी गाउँमा रहेका दाजु भाईको कथालाई उत्थान गरिएको फिल्मले दर्शकलाई सन्तुष्ट दिन सक्ने हो की हैन भने कुरा फिल्म हेसरसकेपछि थाहा होला । जे होस् प्रिमियरमा फिल्मलाई मन पराउने भन्दा मिश्रीत प्रतिक्रिया दिनेको बढि माहोल छ ।

सौगात मल्ल, विपिन कार्की, मिरुना मगर र मेनुका प्रधान लगायतको मूख्य भुमिका रहेको फिल्मलाई निगम श्रेष्ठले निर्देशन गरेका हुन् । फिल्मलाई विक्रम सिंह थारुले निर्माण गरेका हुन् । निगमले निर्देशन गरेको फिल्म छड्के व्यवासायिक रुपमा असफल फिल्म हो । यसो त उनी नायिका मिरुना मगरलाई सेक्सुअल ह्यारिसमेन्ट गरेकै कारण सुनिल रावलको फिल्म लाउरेबाट निकालिएको विवाद चर्चा भएको थियो ।