टिक्यो स्टारडम टिकेन अकुपेन्सि, ‘कृ’ले शो थप्न सकेन (बक्स अफिस)

फिल्मी फण्डा । यस बर्षको बहुप्रतिक्षित भनिएको फिल्म कृ आज शुक्रवारबाट नेपालभर प्रदर्शनमा आएसँगै दर्शकहरुको विभिन्न प्रतिक्रियाहरु पनि आईरहेका छन् । फिल्मको राम्रो भन्दा पनि नराम्रो प्रतिक्रियाहरु बढि आईरहेका छन् । अनमोल केसीकै कारण सर्वाधिक चर्चामा रहेको फिल्म कृ ले अहिले सम्मकै सर्वाधिक हल पाउन सफल भए । यस अघि फिल्म छक्का पञ्जाले १०० बढि हल पाएको थियो भने फिल्म लज्जाले ११० बढि हल पाएको थियो । अनमोल केसीको स्टारडमकै कारण कृ ले देशभर ११५ बढि हल पाएको वितरकहरुको भनाई छ ।

अनमोलको स्टारडमको कारण ३ दिन फिल्मले बम्पर ईनिसियल व्यापार गर्ने अनुमान सबैको थियो । तर अनुमान गरे जस्तो परिस्थिती सहज भएन । ईनिसियल त भयो, तर सोचेको जस्तो भएन । मल्टिप्लेक्समा भन्दा सिंगल थिएटरमा अनमोल केसीको स्टारडम टिकेको छ । शुक्रवार विहान राजधानीका गोपी कृष्ण हलमा ३ पर्दा सहित अन्य सिंगल थिएटरहरु हाउसफुल भयो । तर मल्टिप्लेक्समा विहान ३० प्रतिशत पनि अकुपेन्सि राख्न सकेन । फिल्मले दिउँसो र साँझको शो मा हाउसफुलको बाटो तय गर्यो । अनमोल केसीको फिल्म भन्दै धेरै दर्शकहरु हलमा आएको पक्कै हो । यस अर्थमा अनमोल केसीको स्टारडम टिकेको प्रमाणित हुन्छ ।

फिल्म हेरिसकेका अधिकांश दर्शकहरुले निर्माताले फिल्म नयाँ तरिकाले बनाउन खोज्दा खोज्दै केही कमजोरी रहेको लगायत नराम्रो प्रतिक्रियाहरु दिए । विशेष गरि यूवतीहरुले अनमोलको तारिफ गरेका छन् भने कतिपयले अनुप विक्रम शाहीको पनि तारिफ गरेका छन् । दुई बर्ष पछि पर्दामा फर्केका अनमोलले जति मेहनत खर्चेका छन् त्यो अनुसारको फिल्म नरहेको धेरैको भनाई छ । ओपनिङ अनुसार फिल्मले आईतवार सम्म ईनिसियल व्यापार गर्ने छ भने आईतवारदेखी व्यापारमा दरार रहने अनुमान छ ।

शुक्रवार दिनभरको देशभरी अकुपेन्सि हेर्ने हो भने ५५ प्रतिशत मात्रै रहेको छ । राजधानीमा फिल्मले ६० प्रतिशत अकुपेन्सि कायम गरेको छ भने राजधानी बाहिर ५० प्रतिशत मात्रै अकुपेन्सि कायम गरेको छ । यस अघि फिल्म म यस्तो गीत गाउँछु, छक्का पञ्जा लगायतले ७० प्रतिशत अकुपेन्सि कायम गरेको थियो । यसर्थ फिल्मले सोचेको जस्तो अकुपेन्सि भने कायम गर्न सकेन । फिल्मलाई भुवन केसी र सुवास गिरीले संयुक्त रुपमा निर्माण गरेका हुन् भने सुरेन्द्र पौडेलले निर्देशन गरेका हुन् । फिल्म कृ ले शुक्रवार सोचेको जस्तो अकुपेन्सि कायम गर्न नसक्दा मल्टिप्लेक्समा शो थप्न सकेको छैन । बरु आईतवार शो घट्न सक्ने संभावना छ ।