पुजा शर्माको डान्स टु डान्स प्रचार

फिल्मी फण्डा । नेपाली फिल्म क्षेत्रमा आफ्नो फिल्म चलाउन विभिन्न फण्डाहरु मचाउने काम कुनै नौलो तरिका होईन । कतिले गसिपहरु निकाल्छन् भने कुनैले मिडिया बाजी कन्टेन्टहरु निकाल्छन् । कति नेपाल टुर जस्ता कन्सर्टहरु गर्छन् । पछिल्लो समय भदौं २२ बाट रिलिजमा आउन लागेको फिल्मले मिडियाबाजी भन्दा पनि दर्शक लक्षित केही नयाँ तरिका अपनाएका छन् ।

शुरुमा काठमाडौंको केही रेस्टुराँहरुमा वाईफाई पासवर्डको नाम रामकहानी राखेर प्रचार शुरु गरेको फिल्म टिमले पछि रामकहानी लेखेको टिशर्तमा राम कहानीको हस्ताक्षर संकलन प्रचार शुरु गरेको हो । अहिले फिल्मका टिमले राजधानीको विभिन्न ठाउँमा डान्स टु डान्स प्रचार अभियान शुरु गरेको छ । स्कुले विद्यार्थीहरुलाई प्रयोग गर्दै फिल्मका कलाकारले डान्स गर्ने र त्यसमा सहभागी विद्यार्थीहरुले पनि डान्स गर्ने अर्थात डान्स टु डान्स प्रचार शुरु गरेको हो ।

शनिवार मात्रै अक्सिडेन्टल वोर्डिगं स्कूलका झण्डै दुई सय जना विद्यार्थीले असनको चोकमा फिल्मको ‘तिम्रो लागि म छु’ बोलको गीतमा नृत्य प्रस्तुत गरे । स्कूले बालबालिकासँगै कलाकारहरु पूजा शर्मा, आकाश श्रेष्ठ, केदार घिमिरे र जितु नेपालले उक्त गीतमा नृत्य प्रस्तुत गरेका थिए । काठमाडौंको विभिन्न ठाउँमा डान्स टु डान्स प्रचार गरिने निर्मात्री समेत रहेकी पूजाले बताएकी छिन् । सुदर्शन थापाको निर्माण तथा निर्देशन रहेको ‘रामकहानी’ ले यो पटक फरक प्रचार शैली अपनाएको हो ।