फिल्म ‘एउटा यस्तो प्रेम कहानी’को ट्रेलर सार्वजनिक

फिल्मी फण्डा । रिलिजको ३ दिन अगाडि मात्र सार्वजनिक गरिएको फिल्म ‘एउटा यस्तो प्रेम कहानी’को ट्रेलरमा नायक शिव श्रेष्ठको एक्सन र गीत मात्र समावेश गरिएको छ ।

लकडाउनपछि रिलिज हुन लागेको पहिलो नयाँ नेपाली फिल्मभएकाले पनि यसप्रति फिल्म क्षेत्रकै आशा जोडिएको छ । तर, निर्माणपक्षले ट्रेलरमा संवाद प्रयोग नगर्दा दर्शक हलसम्म आकर्षित हुने एउटा पाटो भने कमजोर देखिएको छ । फिल्मको ट्रेलरमा नायक शिव श्रेष्ठको एक्सन र फिल्ममा रहेका २ वटा गीत समावेश गरिएको छ । फिल्ममा शिव श्रेष्ठ, प्रियंका कार्की, वर्षा राउत, आयुष्मान देशराज जोशी, संजोग कोइराला, नरेन खड्का, कविता मानन्धर, शक्ति श्रेष्ठको मुख्य भूमिका छ ।

ट्रेलरमा शिव र प्रियंकाको प्रेम दर्शाउन खोजिएको छ । फिल्मको ट्रेलर र गीतले दर्शकलाई बलियो तरिकाले आकर्षित गर्न नसकिरहेको समयमा फिल्मको व्यापार कस्तो हुन्छ भन्ने वुझ्नका लागि शुक्रबारसम्म प्रतिक्षा गर्नैपर्छ । दिपेश सापकोटा निर्देशित यो फिल्मलाई दिनेश दर्शनधारी र यशोधा राइले निर्माण गरेका हुन् ।