पुष्पको ‘कृष्ण लीला’ नयाँ वर्षमा
फिल्मी फण्डा । पुष १० गतेबाट खुलेका सिनेमा हल दर्शकको पखाईमा भए पनि फिल्म निर्माण बढेको छ ।
सरकारले छायांकन अनुमति दिएपछि केही फिल्मको छायांकन समेत पूरा भइसकेको छ । यसमध्ये एक हो, ‘कृष्ण लीला’ । यो फिल्म अहिले पोस्ट प्रोडक्सनमा छ ।
अभिनेता पुष्प खड्का र अभिनेत्री श्रद्धा क्षेत्रीको मुख्य भूमिका रहेको फिल्मको केही दिनमा पहिलो गीत सार्वजनिक गरिँदैछ । प्राप्त जानकारी अनुसार, निर्माण पक्ष नयाँ वर्ष (२०७८) मा फिल्म प्रदर्शन गर्ने तयारीमा जुटेको छ । फिल्मलाई दीपक ओलीले निर्देशन गरेका छन्। यो फिल्म नयाँ वर्षमा प्रदर्शन भए पुष्पलाई निकै तनाब हुने देखिन्छ ।
किनकि, उनी अभिनीत अर्को फिल्म ‘मनसँग मन’ नयाँ वर्षको छेको पारेर आउँदो चैत २७ गतेबाट प्रदर्शनमा आउँदैछ । ‘कृष्ण लीला’ ले पनि नयाँ वर्षलाई प्रदर्शन मिति घोषणा गरे पुष्पको बक्सअफिसमा आफैंसँग भिडन्त हुनेछ, जुन हेर्न निकै रोचक हुनसक्छ । कृष्ण लीला’ मा बुद्दि तामाङ, रबिन्द्र झा, नवीन रेग्मी, हिउँवाला गौतम, भावना गुरुङ, आयुष गुरागाई लगायतको पनि अभिनय छ ।
रत्न श्रेष्ठ कार्यकारी निर्माता रहेको फिल्ममा अर्जुन पोखरेलको संगीत, लक्ष्मण सुवेदीको कथा, रामजी लामिछानेको कोरियोग्राफी र बाबु श्रेष्ठको छायांकन रहेको छ ।
रोहित कट्टेलको प्रस्तुति रहेको फिल्मको निर्मातामा प्रकाश कार्की र केवल तामाङ छन् ।
यसमा तपाइँको प्रतिक्रिया दिनुहोस