बाबु छोरा बिचको पुस्तान्तरमा ‘ब्ल्याक’
बाबु छोराको पुस्ताबीच हुने असमझदारीलाई कथामा उनेर ‘ब्ल्याक’ नामको फिल्म बन्ने भएको छ । बिहीबार कमलादीस्थित गणेश मन्दिरमा सेतो परेवा उडाउँदै फिल्मको औपचारिक घोषणा गरिएको हो । आश्मा फिल्मस्को प्रस्तुति रहने फिल्मलाई प्रदिप श्रेष्ठले निर्देशन गर्न लागेका हुन् । दुई पुस्ताबीचको द्धन्द्ध सामाजिक जीवनको अभिन्न अंग हो । आ–आफ्नो मान्यतामा अडिग रहने बाबु र छोरा पुस्ता सधैं आफ्नो मान्यताका लागि लडिरहेका हुन्छन् ।
यस्तोमा नयाँ पुस्ताले सधैं अघिल्लो पुस्तालाई आफूहरुको कुरा नबुझ्ने र परम्परावादी भनेर आरोप लगाउँछ भने पुरानो पुस्ताले पनि नयाँ अनुभवका हिसाबले परिपक्व नभएको तर्क पेश गर्छ । फिल्ममा आकाश श्रेष्ठ र रेनुका सिंह ठकुरीको मुख्य भूमिका रहनेछ । आकाशले यसअघि ‘म त तिम्रै हुँ’ र ‘तिमीसँग’मा अभिनय गरिसकेका छन् भने रेनुकाले यही फिल्मबाट डेब्यु गर्न लागेकी हुन् ।
फिल्ममा अघिल्लोे पुस्ताका कलाकारको पनि उपस्थिति रहनेछ । फिल्ममा सुन्दर श्रेष्ठ, आश्मा पाण्डे, आयुष रिजाल, धिरेन शाक्य, सुशील क्षेत्री, प्रिया रिजाल, , पनि महत्वपूर्ण भूमिकामा देखिनेछन् । आश्मा पाण्डे निर्माता रहेको फिल्ममा मौनता श्रेष्ठको लेखन, रामशरण उप्रेतिको छायांकन, महेश खड्का र प्रदिप पौडेलको संगीत रहेको छ । बसन्त अधिकारी मुख्य सहायक निर्देशक रहेको फिल्ममा नृत्य निर्देशन रामजी लामिछानेको रहेको छ ।
यसमा तपाइँको प्रतिक्रिया दिनुहोस