फिल्मी फण्डा । महाशिवरात्रीको अवसर पारेर फागुन १४ गते प्रदर्शनको तयारीमा रहेको चलचित्र 'लाज शरणम्' को क्यारेक्टर पोस्टर सार्वजनिक गरिएको छ। पोस्टरमा फिल्मका प्रमुख पात्रहरूको दृश्यहरू प्रस्तुत गरिएको छ, जसमा सिताराम कट्टेल (धुर्मुस्) लाई प्रमुख स्थान दिइएको छ। बिजय बराल, अर्पण थापा, महेश त्रिपाठी, कमलमणी नेपाल र मुकुन्द श्रेष्ठलाई पनि पोस्टरमा समावेश गरिएको छ।

पोस्टरमा धुर्मुस्लाई नेताको भूमिकामा देखाइएको छ, जसको लुक्सले पूर्वमन्त्री तथा कांग्रेस नेता मोहम्मद आफतव आलमलाई झल्काएको अनुमान गरिएको छ। साथै, पोस्टरमा देखिएका कफिन बोकेका स्थानीयहरूको दृश्यले फिल्मको गहिरो कथावस्तु प्रकट गर्दछ। यसअघि धुर्मुस् चलचित्रमा छन् कि छैनन् भन्ने रहस्य रहेकोमा, अहिले पोस्टरले उनको महत्वपूर्ण भूमिका पुष्टि गर्दछ।

नविन श्रेष्ठको लगानीमा निर्मित यस चलचित्रलाई कुमार कट्टेलले निर्देशन गरेका हुन्। 'लाज शरणम्' हास्य टेलिश्रृंखला 'सक्किगोनि' टिमले निर्माण गरेको फिल्म हो। यसमा अर्जुन घिमिरे (पाँडे), सागर लम्साल (बले), हरिष निरौला (क्रकोज), प्रियाना आचार्य (मुन्नी) लगायतका कलाकारहरूको अभिनय रहेको छ।

फिल्मी फण्डा २०८१ माघ ११,शुक्रवार ०४ : ०५ PM

3.8k Shares